BUTUAN CITY – Sa tumong nga matabangan ang mga mag-uuma nga mapatubigan ang ilang mga basakan sa ingon maka-produce sila og taas nga kalidad sa mga produktong agrikultura, nag-construct ang National Irrigation Administration kon NIA Caraga pagpanguna ni Regional Manager June Nathaniel Plaza, sa ilang unang drip irrigation ning rehiyon.
Gipatuman kini sa NIA Agusan del Norte, Surigao del Norte, ug Dinagat Islands kon NIA-ASDI Irrigation Management Office, sa may Purok 4, Sitio Tagkiling, Brgy. Anticala, ning siyudad sa Butuan City, ug gitugyan na ngadto sa Tagkiling Farmers Irrigation Association human ang seremonya ning mi-aging adlaw.
Ang drip irrigation system nga nagkantidad og 16-milyunes pesos, gipatuman pinaagi sa usa ka kontrata nga gisugdan niadtong Agusto ning mi-aging tuig 2021 ug nakompleto niadtong Pebrero ning tuiga.
Gilangkuban ang maong proyekto sa konstruksyon sa diversion works, pump house facilities, drip irrigation system, distribusyon sa mga pipelines ug pag-instalar sa usa ka solar powered pump.
Ang irigasyon magkuha og tubig gikan sa Simuloy Creek ug mabenepisyuhan sa 60 ka mga mag-uuma pagpangina ni Rosalina Cabaton, ang irrigation association president, aron maoy mumintina sa nasangpit nga mga proyekto.
