BUTUAN CITY – Wanted na karon sa Federal Bureau of Investigation kon FBI sa Estados Unidos si Kingdom of Jesus Christ (KJC) founder Pastor Apollo Carreon Quiboloy ug laing duha niya ka mga church members.
Nag-isyu na ang FBI og “Wanted” posters alang nila Quiboloy, Teresita Tolibas Dandan ug Helen Panilag.
Sigon sa FBI, wanted si Quiboloy tungod matud pa sa partisipasyon niya sa labor trafficking scheme nga maoy nagdala sa mga membro sa iyang simbahan ngadto sa Estados Unidos gamit ang mga pekeng visas ug mipugos pa sa mga membro pag-solicit og mga donasyon alang sa bogus charity, mga donasyon nga gigamit pag-finance sa operasyon sa iyang simbahan ug bongga nga lifestyles sa mga lider sa simbahan.
Gawas niini, ang mga membrong milampos pag-sollicit alang sa simbahan, pugsanon usab nga gipasulod sa sham marriages aron makakuha og mga fraudulent student visas sa ingon makapadayon pag-solicit didto sa US sa tibuok tuig.
Migawas usab sa imbestigasyon sa FBI nga ang mga babayeng ma-recruit, patrabahuon isip mga personal assistants o kaha mga pastorals alang kang Quiboloy ug sila usab ang mag-andam sa iyang mga pagkaon, maghinlo sa iyang mga pinuy-anan, magmasahe kaniya ug gi-require pang makighilawas kaniya kansa gitawag sa mga pastorals nga ‘night duty’.
