BUTUAN CITY – Tumang kalipay ang gibati sa katawhan sa Bohol human nga midaog si Mark ‘Magnifico’ Magsayo sa ilang away ni American boxing champion Gary Russel Jr. hinungdan nga iyang nakuha ang World Boxing Council kon WBC featherweight belt.
Sa eksklusibong pakighinabi sa Bombo Radyo Butuan, gipadayag sa amahan ni Mark nga si Joseph Judy Magsayo nga nagbutang og dakong screen sa City Hall grounds ang mayor sa Tagbilaran City aron duna’y makita nga live nga away ang katawhan ilabina nga daghan pa sa mga lungsod sa maong lalawigan ang wala pa gihapo’y linya sa kuryente human gihapak sa bagyong Odette.
Blangko pa si Judy kung unsa ang plano sa probinsyal nga panggamhanan higayong mupa-uli na ang iyang anak. Aminado ang amahan sa Pinoy champion nga pobre gihapon sila karon ug ang kada-ugan sa iyang anak batuk kang Russel, gila-umang mao na’y maghaw-as kanila gikan sa kalisod bisan pa man og duha ka tuig nang minyo ang Pinoy boxer.
Sigon ni Judy, misaad matud pa ang iyang anak atol sa ilang videocon kagahapon nga mupalit kini og balay alang sa ilang pamilya aron mahaw-as na gikan sa squatter’s area nga maoy gitarukan karon sa ilang panimalay.
Nagsugod matud pa ang kahilig sa iyang anak sa boksing dihang nakita ang away ni Pacman niadtong namaligya pa kini og ice cream kondiin mibilib kini sa kasikat sa Pinoy ring champion.
Kutob lang sa high school ang pagtungha sa iyang anak kinsa scholar sa ilang mayor ug mihangyo nga dili na mutiwas sa kolehiyo tungod kay iyang ipadayon ang iyang damgong mahimong sikat nga boksidor.
Kanunay na kining midaog sa mga local events hangtud nga nasulod kini sa ALA Promotions nga maoy nagbansag kaniyang Magnifico tungod sa iyang awak sa Amerika kaniadto kondiin anaa pa gihapon kaniya ang bakus.
Unang gipalit matud pa ni Mark gikan sa kita sa iyang away niadtong unang apil niya sa national boxing event nga gipahigayon sa Tagbiliran kondiin iyang nabulsa ang ganting 10-mil pesos nga maoy gipalit niini og 24-pulgadas nga TV set.
Nasayrang upat ang iyang mga anak kondiin ikatulo si Mark kinsang manghod nga lalaki milambigit usab sa pamoksing apan gipa-undang aron mapadayon ang pagtungha
