BUTUAN CITY – Giklaro ni Butuan City agriculturist Engr. Pierre Anthony Joven nga ang project contest ning siyudad nga AgriBoost kansa maoy gisubmiteng entry, ang nagpadaug sa Butuan sa 2021 Bloomberg Philantrophies Global Mayors’ Challenge.
Sa eksklusibong pakighinabi sa Bombo Radyo, gipadayag sa opisyal nga ka-abag sa city government sa pag-develop sa ideya alang sa maong proyekto ang mga mag-uuma ug mga tabuan vendors.
Dinhi nila gisuta ang problema sa mga mag-uuma diha sa pagtikad nila sa yuta ug gipangayuan usab sila og maayong solusyon sa nasangpit nga mga problema nga matunol sa gobyerno ug sa pribadong sektor.
Susamang ideya usab ang ilang gihimo sa mga tabuan vendors ilabina diha sa ilang pagpamaligya ug pagpangita og sideline aron lang mukita.
Ang tanang mga data nga makuha gikan sa mga mag-uuma ug sa mga tabuan vendors, maoy gi-analisa sa usa ka project component nga gitawag og agri hub kansa mao ang magtulay tali sa mga farmer producers ug sa mga vendors.
Ubos sa AgriBoost project, gikunhuran ang mga mamikilay tali sa mga mag-uuma ug mga vendors kansa maoy hinungdan nga pag-abot sa merkado, mahal na kaayo ang agri-products nga ipamaligya.
