BUTUAN CITY – Gitaho ni Shiralyn Baquiano Hjerming direkta gikan sa Ringsted, Denmark nga nakatala na og 18 ka kumpirmadong kaso sa Omicron variant ug 42 ka mga suspected cases ang maong nasud.
Sa eksklusibong pakighinabi sa Bombo Radyo Butuan, gipadayag sa kanhi Butuanon nga ang 18 ka mga kaso pulos mga Danish ug wala’y natala sa mga overseas Filipino workers kon OFWs.
Bisan og kontrolado pa sa gobyerno maong nasud ang maong mga kaso positibo si Hjerming nga madugangan pa kini tungod kay winter season sa ila karon nga maoy paboritong klima sa coronavirus aron mas mukaylap pa kini.
Sa pagkakaron, wala pa’y gipagawas nga advisory ang Philippine Embassy alang sa tanang mga Pinoy nga atua sa maong nasud apan sa iyang nasayran, apil ang Denmark nga gi-categorize sa Pilipinas isip yellow country kansa nagpasabot nga kung mu-uli sila sa nasud, kinahanglan gihapon nilang mupa-ilalom sa kwarantina.
