BUTUAN CITY-Muabot sa 50.5178 gramos ang timbang sa suspected shabu kansa mibalor og 340,000 pesos, nga nakumpiska sa Philippine Drug Enforcement Agency kon PDEA-Caraga atol sa ilang gilusad nga anti-illegal drug buy bust operation ning mi-aging adlaw sa may Barangay Holy Redemeer ning siyudad sa Butuan.
Sumala ni Dindo Abellanosa, tigpamaba sa PDEA-Caraga sa eksklusibong pakighinabi sa Bombo Radyo Butuan, hangtod sa pagkutlo niini nga balita, padayon pang gipaningkamotan sa ilang operatiba nga mapasaka ang tukmang kaso batuk sa mga suspetsadong sila Dhariy Ybañez, 31-anyos ug Shiela Grace Saramosing, 30-anyos parehong residente sa Barangay Banza ning siyudad ug dunay 4 ka mga anak sulod sa 11 ka tuig na nga panag uban.
Apil niini ang paglapas sa Section 5 kon pagbaligya sa illegal nga druga ingon man Section 26 kon panagkunsabo ug Section 15 kon pagamit sa ilegal nga druga tungod kay nagpositibo sa ginadiling druga ang lalaki.
Tungod niini dili na maka-ikyas ang asawa sa kasong ipasaka tungod kay lakip kini sa nakita diha sa dapit nga nahitabu-an ilabina nga usa ka planadong transaksyon kini.
Sumala pa ni Abellanosa, pila na ka higayon nila kining gi-monitor piaagi sa ilang poseur buyer ug niadtong higayuna lang kini nila nasapon.
Samtang dili matud pa pwedeng maka-avail ang mga suspek sa Free Bargaining Agreement sa Supreme Court tungod kay dakong gramo ang nakuha gikan kanila nga milapas na sa usa ka gramo.
Apan mahatagan matud pa sila og tsansa nga magbag-o hangtod nga mu-agi pa sa ubang proseso ingon man pagpa-ilalom sa rehabilitation program sa gobyerno.
Giklaro usab ni Abellanosa nga dili ma-apektuhan sa ingon niini nga modus ang drug cleared na nga barangay kung nakumpleto na sila sa mga dokumento.
Apan kung wala pa maka-comply sa mga requirements, tan-awon pa kini sa operatiba sa gobyerno aron masayran kung wala ba nagpasagad ang mga opisyales sa maong barangay.
Sa kasamtangan, migamit na usab og body cameras ang maong buhatan sa tanan nilang gilusad nga operasyon tungod kay mando usab kini sa ilang bag-ong regional director.
