BUTUAN CITY – Gipanghimakak ni Norvin Cuevas, ka-ubanang mangingisda sa gipusil-patay nga si Ikiel Kintanar ug operator sa fishing boat nga ilang gisakyan ang pamahayag sa taga-PNP Maritime nga nagpasalba lang sila dihang gisita silang unom ka mga mangingisda samtang anaa sa kadagatan sa Brgy. Calibunan sa Cabadbaran City.
Sa eksklusibong pakighinabi sa Bombo Radyo Butuan, gipadayag ni Cuevas nga giti-on diha mismo kanila ang armas sa maong mga pulis dihang gisinggitan silang dili manibat ug paglabay lang matud pa sa 3-segundos gipabuthan na sila.
Dinhi na matud pa natagak ang katunga sa lawas ni Ikiel human na-igo sa dughan rason nga dali niya kining gi-agak.
Wala matud pa nanumbaling ang namusil nga mga sakop sa PNP Maritime dihang nagpatabang sila nga dalhon sa ospital ang biktima rason nga dali na usab niyang gipa-andar ang gipalong na niyang bangkang panagatan, padulong na sa baybay arond alhon kini sa ospital apan wala na kini naka-abot pang buhi.
Gipanghimakak usab ni Cuevas ang alegasyon sa mga responsable nga ilegal ang ilang gigamit sa pagpanagat tungod kay dagko matud pa og mata ang ilang gipangdalang pukot gawas nga igo lang silang nag-arya sa distansyang 15-metros ug dihang minos ang nakuhang isda, nagliba na usab sila hangtud nga nagdesisyong manghipos na aron manguli.
Dinhi matud pa kalit nga nangabot ang nagpatrolyang mga sakop sa PNP Maritime nga nani-on ug nagpabuto kanila.
