BUTUAN CITY – Nagpadayon ang hot pursuit operation sa kwerpo sa kapulisan ug militar batok na sa mga rebeldeng New Peoples Army nga namusil sa mga watchmen sa usa ka construction company sa bukirang bahin sa Purok 2, Brgy Zone 2, Lanuza, Surigao del Sur ug pagpanunog sa duha nila ka mga heavy equipment pasado alas 9 kapin kon kulang ning nakalabay’ng gabii.
Sa pakighinabi ning sibyahan, gipadayag ni LCol. Michael Rey Reuyan, Commander sa, 36IB Philippine Army, dungangan pa nila ang ipadalang tropa aron paggukod sa mga responsable sa gihimong pagpang-harass nga gipangunahan ni Ka Megan kansa mipatay kang Eldrin Daraman, tigbantay sa mga heavy equipment ug pagka- angol usab ni Melvin Buniel nga padayon karung nagpa-alim.
Sumala ni Lt.Col Reuyan, gawas sa pagdugang sa mga tropa sa paggukod sa mga NPA pahugtan usab ang pagmuntar og mga checkpoints sa tanang mga lungsod sa lalawigan. Dili tanang mga heavy equipment ang nasunog human nakaresponde usab ang BFP apan dili pa matino og pila damyos.
Madumdumang miresponde ang Lanuza MPS uban ang militar sa lugar diin nahimutang ang mga gisunog nga heavy equipments human nadawat ang report apan naghimo usab og mga pag-babag ang NPA nga miresulta sa engkwentro.
Hinuon walay samaron sa kabahinan sa gobyerno batok na sa gibana-banang 20 ka mga sakop sa NPA.
Sumala pa, gawas sa pagsunog sa mga heavy equipment, gipa-arakan usab sa mga rebeldeng ang police station sa Lanuza hinungdan sa pila ka minutogn engkwentro.
Samtang gi-angkon usab ni Ka Sandara Sidlakan, nagpailang tigpamba sa NPA-Surigao del Sur nga mga sakop nila ang responsable sa maong insidente kansa usa matod pa ka planadong pagpangatake dungan sa pag-alegar nga mga CAFGU members ang napatay ug na-angol nga watchman sa maong construction company ug dili mga sibilyan.
