BUTUAN CITY – Mi-apela si Butuan City ug Agusan del Norte 1st District Rep. Lawrence Lemuel Fortun ngadto sa tanang mga private schools sa tilbuok nasud nga magpatuman una og moratorium sa na-andan na nilang tinuig nga tuition fee hike sulod ning tuiga hangtud sa 2022.
Kini tungod na usab sa epektong hatud sa COVID-19 pandemic kondiin daghan ang nawad-an og trabaho tungod sa daghang mga negosyo usab nga nagsira.
Sa eksklusibong pakighinabi sa Bombo Radyo Butuan, gipadayag sa kongresista nga nakig-alayon na sila sa Kongreso ngadto sa Commission on Higher Education kon CHED ug sa Department of Education kon DepEd aron ma-ayudahan gilayon ang mga private schools aron malikayan ang mga fee hikes.
Ila matud pa kining pruybahan sa mga pandemic tax rates kondiin ang mga gagmay nga non-profit proprietary school, maka-avail niini pinaagi sa saktong filings tali sa Bureau of Internal Revenue kon BIR.
Lakip sa gisugyot sa kongresista ang provision sa non-cash assistance sama sa rice subsidies ug mga grocery vouchers alang sa mga faculty ug non-teaching personnel.
Iyang gibutyag nga ang Department of Social Welfare and Development kinahanglang makig-alayon sa mga asosasyon sa mga private schools aron ang mga relief goods ug hygiene kits mahatag na ngadto sa mga personahe sa mga gagmay’ng private schools.
Gani, ang Department of Labor and Employment mahimo usab nga maglakip sa mga gagmay’ng pribadong tunghaan alang sa ilang Bayanihan cash aid programs, samtang ang Inter-Agency Task Force for the Management of Emerging Infectious Diseases, mamahimong magkab-ot og non-tax incentives nga makapakunhod sa operations costs sa mga gagmay’ng private schools ug ubang mga gagmay’ng negosyo.
Gibutyag niini nga ang Corporate Recovery and Tax Incentives for Enterprises (CREATE) Act mahimong magsilbing giya alang sa pagkunhod sa pagsalig sa tax incentives isip tools sa national policy.
