BUTUAN CITY – Wala magpakita og simtomas kon asymptomatic ang nadiskitahang B.1.1.7 kon mas nailang UK variant sa COVID-19 dinhi sa Caraga region niadtong Marso 19.
Kini ang gikumpirma ni Department of Health kon DOH-Caraga spokesperson Romelyn Torralba, dungan sa pagbutyag nga ang bugtong kaso, pahumanay na sa iyang quarantine period.
Samtang ang laing natalang duha ka mutations nga ubos pa sa imbestigasyon, pulos usab asymptomatic ug nakatapos na sa ilang quarantine period.
Sa eksklusibong pakighinabi sa Bombo Radyo Butuan, gipadayag ni Torralba nga duna na sila’y surveillance teams nga maoy mihimo sa contact-tracing sa mga tawong nakahugoy-hugoy sa mga lugar nga ilang nahimutangan ilabina sa nagpositibo sa UK variant nga usa ka returning overseas Filipino kon ROF nga gikan sa United Arab Emirates kon UAE.
Nakuhaan na kini sa tanang mga impormasyong angayang kuhaon base sa guidelines sa National Inter-Agency Task Force ug ang hingtungdang LGU na ang mihimo sa contact tracing hangtud sa iyang third generation nga mga tawong na-contact.
Giklaro pa ni Torralba ang mga medikong proseso nga agi-an sa maong pasyente tungod sa iyang espesyal nga kaso kansa sukwahi sa prosesong agi-an sa mga tawong i-quarantine human nadiskitahan sa orihinal nga COVID-19 infection.
