BUTUAN CITY – Hustisya ang singgit sa pamilya Taray ug sa mga higala ni Engr. Lanie Taray nga taga-Purok 2, Cagui-on, Brgy. Tabon, Bislig City tungod sa kadudahang kamatayon niini.
Madumdumang nakalatid sa blotter book sa Bislig City Police Station nga base na sa pag-asoy sa driver sa ambulansya ug kaubanan niini, bandang ala-1:20 sa hapon niadtong Biernes, Disyembre 10 gikuha gikan sa ilang panimalay ang biktima aron dad-on sa quarantine facility sa lugar human mi-abot gikan sa Metro Manila via Davao City apan pag-abot sa National Highway, Brgy. Maharlika, Bislig City, Surigao del Sur, gi-abrehan matud pa sa biktima ang pultahan sa ambulansya dayong ambak resulta sa iyang kamatayon.
Dali pang gidala sa ospital ang biktima apan gideklara kining dead on arrival sa attending physician. Dali usab nga mitugyan sa ilang kaugalingon ang driver sa ambulance nga si Jeyrex Tuburan Garrido, 24 anyos, taga P-7 Castillo Village, Mangagoy, Bislig City ug ang kaubanan niini nga sakay nga si Johnrey Benore, 21 anyos nga parehong contract of service.
Apan sigon ni Tata Pilo, higala sa biktima ug ka-ubanan niya og trabaho sa Metro Manila, duna’y mga circumstantial evidences nga magtumbok nga imposible ang gipasi-atab sa mga misundo sa iyang ka-uban tungod kay kung mi-ambak kini, wala kini mga garas ug bun-og sa lawas nga resulta sa iyang pagkahulog gwas pa nga naka-padlock sa gawas nga bahin ang pultahan sa sakyanan butang nga imposibleng maablihan ni Taray gikan sa sulod nga bahin samtang nagdagan ang sakyanan.
Kini ang hinungdan nga gisinggit nila hangtud karon uban sa pamilyang Taray ang hustisya ug paglusad og tukmang imbestigasyon aron mapanubag ang duha kung ugaling duna sila’y gihimong dautan ngadto sa biktima nga maoy posibleng hinungdan sa pag-ambak niini kung tinuod man kining mi-ambak.
