BUTUAN CITY – Crime of passion ang gitu-uhang motibo sa pagpusil-patay sa usa ka ginang pasado alas-7:20 kagabii duol sa Pilot Central Elementary School sa lungsod sa San Francisco, Agusan del Sur.
Kini human nasubay sa kapulisan ang gitu-uhang responsable sa pagpatay sa biktimang si Jenvie Busico, 34-anyos, tigpahulam og kwarta, minyo ug residente sa Purok 7, Brgy.2 sakop sa maong lungsod.
Kini human nasusi sa cellphone sa biktima ang convo niini ngadto kang Alvin Arvillo Gonzales alyas Jojo, 37-anyos, minyo, lineman sa Agusan del Sur Electric Cooperative kon ASELCO ug residente sa Purok 3, Brgy. Bonbon sakop sa susamang lungsod.
Sa eksklusibong pakighinabi sa Bombo Radyo Butuan, gibutyag ni PMajor Darwin Yu, hepe sa San Francisco Municipal Police Station, migawas sa convo sa duruha nga nasuko ang suspek ngadto sa biktima tungod sa pagbalewala na niini kaniya kondiin duna pa’y punto nga gibira pa sa suspek ang iyang buhok.
Duna matud pa’y tulo ka mga nakasaksi sa hitabo kondiin nakita ang motorsiklong gisakyan sa suspek kansa mitukma sa mipusil sa biktima rason nga ila kining gidakop pasado alas-dies kagabii.
