BUTUAN CITY – Sunugon ning adlawa ang mga ginadiling druga nga nakumpiska sugod niadtong tuig 1999, 2000, 2007 ingon man gikan 2014 hangtod 2019 human nga wala malakip ning mi-aging pagsunog.
Kini subay na usab sa mando ni Pangulong Duterte nga sunogon ang mga nakumpiskang druga aron dili na mabalik pa ngadto sa kadalanan human usab nagpagawas og court order aron tugutan ang pagsunog sa mga niini.
Sa eksklusibong pakighinabi sa Bombo Radyo Butuan, gibutyag ni Dindo Abellanosa, tigpamaba sa Regional Philippine Drug Enforcement Agency kon PDEA-Caraga, misuma-total sa P22,798,377.16 ang kantidad niini base sa gihimong inventory sa chemist laboratory.
Ang maong mga ginadiling druga naggikan sa RTC Branch 1 hangtod 5 ug 33 dinhi sa dakbayan sa Butuan ingon man Branch 34 sa Cabadbaran City.
Adiser ang pagsunog, duna pa’y himuong sampling aron makita sa mga mutambong kung tinood ba nga druga ang pangsunugon rason nga mokuha og usa ka sample ang ilang laboratoryo og random nga ipahigayon ang lab test.
Tan-awon usab sa National Bureau of Investigation kon NBI kung wala ba’y na-usab sa butanganan niini ilabina sa mga markings nga nakabutang.
Sumala sa opisyal, samtang anaa na sa board sa buhatan ang maong drugas dunay 3 ka tawong tugutang mugunit sa yabe niini ug kung dunay mawala nga usa ka yabe sa wala pa ang panahon sa pag abli, buot pasabot nga dili gyud ma-abli usab ang mga vault niini.
