BUTUAN CITY – Padayon ang pagsaka sa ihap sa kaso sa Covid-19 dinhe sa rehiyon sa Caraga. Sa pinaka-ulahing anunsiyo sa Department of Health kon DOh-Caraga, dunay nadugang nga 33 ka mga bag-ong positibong kaso sa virus diin 21 ang mga babaye og 12 ang mga lalaki.
Usa ka 4-anyos usab ang pinakabata nga nataptan samtang 70-anyos ang pinakatigulang. Ang nasangpit nga mga kaso nagsumikad sa Agusan Del Norte nga dunay 3 pinaagi sa Buenavista, Jabonga og Santiago; 3 usab sa Surigao Del Sur pinaagi sa Cagwait, carrascal og Tago; Bislig City dunay 4 pinaagi sa Mangagoy 3 og usa sa Poblacion; Cabadbaran City 1; Tandag City 3; samtang sa Butuan City dunay 19.
Dinhe ning siyudad, ang mga kaso nagsumikad sa tag-tulo sa Barangay Libertad og San Vicente; tag-2 sa Baan Riverside, Doongan og Pangabugan; tag-usa usab sa Baan-km3, Diego Silang, Golden Ribbon, JP Rizal, Limaha, Tiniwisan, og Villa Kananga.
Sa 33 ka mga bag-ong kaso, 17 ang asymptomatic, 14 ang mild symtoms samtang 2 ang sever.
Samtang dunay usa usab nga nadugang sa napatay. Kini mao ang 70-anyos nga babaye sa Butuan City kansa walay comorbidity, gi-ubo niadtong Setyembre 27 og gidala sa ospital niadtong Oktobre 3 apan gideklarang dead-on-arrival.
Sa pagkakarun, ang kinatibuk-ang kaso sa Covid-19 sa Caraga misaka na sa 1, 602 diin sa maong ihap 524 ang aktibong kaso, 1,014 ang nakarekober og 64 ang napatay.
