BUTUAN CITY – Suspendido karong Dominggo, Septembre 27, ang business operation sa Gaisano Mall Butuan isip silot sa wala pagpatuman sa health protocols aron mabatukan ang pagkaylap sa COVID-19 rason nga sila sirado sa maong adlaw.
Sa eksklusibong pakighinabi sa Bombo Radyo Butuan, gipadayag ni Atty. Moshie Ariel Cahoy, sa Legal Office sa Business Permits and Licensing Division (BPLD) sa Butuan City Hall, niadto pang Agusto, nagpadala na sila og sulat ngadto sa kadumalahan sa maong mall human nakadawat og reklamo kalabot sa lu-ag kaayong pagpasulod sa mga gwardiya sa mga tawong manulod niini nga gikumpirma usab sa mga empleyado sa City Hall.
Pila ka adlaw lang matud pang gi-aksyunan kini sa kadumalahan sa maong mall apan mibalik ra usab ang wala pagpangita sa mga gwardiya og home quarantine pass niadtong mga manulod nga mao unta’y magpugong sa posibleng pagkaylap p;a og samot sa COVID-19.
Tungod niini, nagpadala sila og 13 ka surveillance teams sa maong mall nga nakuhaan pa og mga videos ug hulagway rason sa ilang pag-isyu og show cause order uban sa rekomendasyong suspendihon ang ilang operasyon sulod sa usa ka semana nga giduso nila sa buhatan ni Mayor Ronnie Vicente Lagnada.
Sa iyang tubag, gi-angkon sa kadumalahan sa mall nga duna sila’y kalapasan dayong hangyo nga usa ka adlaw lang una ang ipahamtang kanilang suspensyon dungan sa pagsaad nga pahugtan na nila ang pagpatuman sa mga health protocols dayong suspend sa mga gwardiyang napamatud-ang wala mangita og quarantine pass sa manulod nga mga shoppers.
Gawas sa Gaisano, duna pa’y laing mga business establishments nga sunod nga isuspende sa city government tungod sa susamang kalapasan.
