BUTUAN CITY – Misangpot sa kamatayon sa usa ka sorbetero kon ice cream vendor ang gihimong buy bust operation on firearm nga gilusad sa kapulisan sa Sitio Dacuman, Bioborjan, Brgy. Rizal, Surigao City pasado alas-6:15 kagabie.
Sa ekskilusibong pakighinabi sa Bombo Radyo Butuan, gi-ila ni PLCol. Christian Rafols, station commander sa Surigao City Police Station, ang suspek nga si Ricky Borromeo alyas Ricric, hingkod ang pangidaron ug residente sa Brgy. Rizal sakop sa maong syudad.
Sumala ni Col. Rafols, nagpahigayon sa maong operasyon ang intelligence operatives sa nasabutang lugar ug kantidad sa armas nga ibaligya sa suspek dihang nakabantay kini nga pulis ang iyang katransakyon rasong mibunot kini sa iyang dalang armas ug gipabuthan ang operatiba hinungdan sa pagbalos sa pulis nga miresulta sa iyang hinanaling kamatayon.
Nakuha sa posisyon niini ang unang nasabutan nga paliton untang kalibre .45 nga pistola sa kantidad nga 15,000-pesos ingon man shabu, aluminum foil, lighter ug uban pang mga drug paraphernalia.
Nasayrang una nang nadakpan ang suspek tungod sa pagpamaligya nini og ginadiling druga didto sa Dinagat Islands adtong 2016 ug tungod niini posibleng dili lang pagmapaligya og armas ang ilegal nga binuhatan niini kundi apil na ang pagpayuhot og shabu.
