BUTUAN CITY- Padayong nag-igmat ang mga control points ning siyudad sa Butuan human nasapon ang truck driver sa usa ka 10-wheeler truck uban ang iyang helper nga nagdala og peke nga resulta sa rapid test dihang mi-agi sila sa Taligaman control ning siyudad sa Butuan kagahapong adlawa.
Ang nasangpit nga trak gabyahe gikan Davao ug pasulod unta ning dakbayan kansa maoy gisakyan nila Noue Cadinas, 26-anyos, residente sa Purok 2, Cabadbaran City ug Relon Cotaslico, 39-anyos, residente sa Bangkas, Davao City.
Sa impormasyon, nasuta sa mga otoridad nga ang dokumento sa mga niini adunay makaduda nga detalye rasong gitawagan gilayon sa City Health Office personnel ang nakapangalan nga laboratoryo ug dinhi napamatud-an nga ang Medical Technologist nga nakapirma dili nila empleyado.
Daling gidala ang drayber ug ang helper sa BCP Station 4 ug gihikay na kasong ipasaka batok sa mga niini.
