BUTUAN CITY – Nadungagan pa og 30 ka mga bag-ong kaso sa coronavirus 2019 ang natala dinhi sa Caraga region diin 28 niini ang gikan sa Butuan ug tag-usa ka kaso sa lungsod sa Buenavista ug sa Cabadbadran City, parehong sakop sa Agusan del Norte.
Sa pinakaulahing case bulletin sa Center for Health Development-Caraga kagabii, gilangkuban ang 30 ka mga bagong kaso sa 10 ka Local transmission cases, walo ang duna’y close contacts sa confirmed local transmission cases, tag-usa ka non-medical frontliner ug Locally Stranded individual ug 10 ka health care workers.
Nasuta usab nga sa mga bag-ong kaso, 2-anyos ang pinakabata ug 60-anyos ang pinaktigulang diin 23 ang mga babae ug 7 ang lalaki.
Nagsumikad usab ang mga bag-ong kaso sa Butuan City sa Brgy. Libertad na dunay 7, tag-duha sa Baan Reverside, Fort Poyohon, JP Rizal, Kinamutan, New Society Village, ug Tandang Sora.
Nakatala usab og tag-usa ka mga bag-ong kaso ang Baan Km 3, Bading, Banza, Bayanihan, Doongan, Masao, Obrero,San Vicente, ug Villa Kanangga.
Sa mga natalang bag-ong kaso ning rehiyon, 25 ang asymptomatic ug lima ang mild.
Sa pagkakaron, ang total confirmed covid cases sa Caraga region miabot na sa 705, diin sa maong ihap 413 ang recoveries nga nadischarge na, 274 ang mga nagpaayo pa o mga active cases samtang milansang gihapon sa 18 ang namatay.
