BUTUAN CITY – Gi-anunsiyo ni Jun Maglinis, Chief sa Land Transportation Office kon LTO-Caraga nga mag-abli na ang buhatan sugod karung Lunes, Agosto 17, 2020 human sa halos 20 ka adlaw nga pagsirado tungod gihapon sa Covid-19.
Sigon ni Maglinis mapasalamaton kini nga nalatasan nila ang pagsulay nga hatud sa maong virus diin ang tanang empleyado sa buhatan nagnegatibo sa Covid-19.
Karung semanaha himoon ang dis-infection og sanitation aron maseguro ang mga kliyente. Giklaro sa opisyal nga mo-cater na sila sa tanang mga transaksiyon sa opisina gawas na lamang sa mukuha og Student Permit kon SP tungod kay kinahanglan moagi kino Driving school.
Gikumpirma usab ni Maglinis nga dunay kamanduan gikan sa kauluhang buhatan nga hatagan og extension nga usa ka bulan ang magparehistro sa sakyanan boot pasabot bisan og molapas ug usa ka bulan gikan sa expiry date, dili kini pahamtangan og penalty.
Apan gi-awhag sa opisyal ang tanan nga dili na maghulat pa sa gihatag nga lugway hinoon hatagan og oras ang pag-transak sa opisina dungan sa pag-awhag nga mutuman sa tanang health protocols aron makalikay sa Covid-19.
Gikumpirma usab ni Maglinis nga sugod karung Lunes ibalik na nila ang puwersa diha sa kadalanan aron pagpatuman sa kamanduang gikanaog aron mabatukan ang kasamtangang pandemya.
Kini ilabina kay sugod karung Agosto 15 i-implementar na ang mandatory nga pagsoot og face shield sa mga pampubikong sakyanan.
Tungod niini gihangyu sa opisyal ang mga sumasakay nga mutuman niini isip pag-amping nga dilio matakdan sa virus ilabina kay duna silay ulian nga pamilya.
