BUTUAN CITY – Nalibog ang simbahang Katoliko ning siyudad sa Butuan sa Executive Order No. 39 nga gipagawas sa lokal nga kagamhanan ning siyudad human ng gipa-ilalom na sa general community quarantine kon GCQ ang siyudad.
Partikular nilang gikalibgan ang pagpakunhod na hinuon sa kapasidad sa mga tawong makasimba ngadto sa napulo taliwa nga mas lu-ag na karon ang community quarantine kumpara sa gipatumang 50-porsientong kapasidad gikan niadtong Hulyo 1 hangtud 15 dihang ubos pa sa modified GCQ ang siyudad.
Sa eksklusibong pakighinabi sa Bombo Radyo Butuan, gipadayag ni Fr. Wilbert Mark Simplicio, ang communication in-charge sa Butuan Diocese, unta nakigdayalogong daan ang taga-city government ngadto sa religious sector adiser nagpagawas og guidelines aron ila usab nga madunggan ang ilang panig.
Sigon ni Fr. Simplicio, karong mas lu-ag na ang gipatumang community quarantine, mas madugangan na unta ang una nang gitugutang 50-porsientong capacity sa mga manulod sa simbahan.
Dugang pa ni Fr. Simplicio, wala usab siya’y nadumdumang duna’y pahimangno kanila ang city government nga duna sila’y nalapas nga health protocols nga posibleng gihimong basehan pagkunhod na sa kapasidad pagdawat nila og mga manimbahay.
Samtang gitawag usab nga unfair kon dili patas ni Pastor Vicente Serrano sa Faith Baptist Church ang kamanduan sa Butuan City Government nga 10 lang ang pwedeng tugutan sa mga mass gathering lakip na niini diha sulod sa simbahan.
Sumala pa ni Pastor Serrano, andam silang musunod sa patakaran sa lokal nga kagamhanan apan ning higayona naglibog siya kung gi-unsa pagbalanse ang maong disesyun.
Pagbutyag pa niini nga kapin 800 ang capacity sa ilang simbahan rasong makadismaya kung 10 lang ang tugutang makasulod rason nga ila karong gikonsidera ang pag-apela sa kamanduan.
