BUTUAN CITY – Nagbahad ang Land Transportation, Traffic and Management Office kon LTTMO-Butuan ngadto sa tanang de-pasayruang sakyanan ning siyudad sa Butuan ilabina sa mga traysikol nga likayan ang sobrang pagpanukot og pamasahe.
Sigon ni PSSgt Henry Tan Jr., information officer sa maong buhatan, andam silang mu-aksyon higayong duna’y ilang madawat nga reklamo kalabot sa sobra kadako sa suktong plitihan nga giyangungo na sa mga commuters.
Dugang pa ni Tan, dili angayang mamugos ang mga drivers tungod kay wala’y bag-ong taripa nga gipagawas ang city government alang sa bag-ong plitehan sa mga traysikel ilabina kung dili uyon sa maong sukot ang mga pasahero.
Alayon niini, nanawagan ang opisyal ngadto sa tanang sumasakay nga dili magpanuko og patabang sa mga traffic enforcers nga anaa sa siyudad aron ma-aksyunan gilayon ang mga abusadong drivers.
