BUTUAN CITY – Hingpit nang gi-uyunan sa Inter-Agency Task Force on Emerging Infectious Disease kon IATF-EID ang hangyo sa Regional Task Force on COVID-19 One Caraga Shield nga temporaryo unang isuspende ang pagpa-uli sa mga locally stranded individuals kon LSIs dinhi sa Caraga Region.
Magsugod kini karong adlawa Hunyo 22 hangtud Hulyo 4 ug hangtud ma-aprubahan ang COVID-19 laboratory testing center sa rehiyon.
Madumdumang unang gihangyo ngadto sa IATF-EID ang pagpahunong una sa bisan unsang “mercy voyage” ug “sweeper flights” human nga ubay-ubay sa mga returning locally stranded individuals ingon man mga Returning Overseas Filipinos kon ROFs ang nagpositibo sa coronavirus human gipa-ilalom sa RT-PCR test.
Samtang sa 157 ka mga LSIs nga gikan sa Manila nga nahidangat sa dakbayan ning miaging gabie gikan sa pantalan sa Nasipit, Agusan del Norte kinsa gisundo og mga sakyanan nga gikomisyon sa Butuan-LGU ug gidala sa Butuan Medical Center kon BMC Annex sa Baan Km. 3 aron ipa-ilawom sa Rapid Anti-body Test.
Sa maong test, tulo ang nagpositibo ug karon anaa na sa quarantine facility sa syudad ug subject for confirmatory test na.
Alayon niini, magpatuman og mandatory rapid testing ang lokal nga kagamhanan sa Butuan sa tanang mga inbibidwal nga dunay tavel history gawas sa Caraga Region o kaha sa mga lugar nga dunay Confirmed Local Transmission sa COVID 19.
Ang mga magpositibo sa maong test obligadong mupa-ilalom sa standard nga 14-day Facility o Strict Home Quarantine.
