BUTUAN CITY – Gitakda karung Lunes, Mayo 11, ang pag-apod-apod sa tag-25 kilos nga bugas isip ayuda sa Butuan City government ngadto sa katawhan ning panahon sa COVID-19 pandemic.
Sigon ni Konsehal Ferdinand Nalcot, Chairman sa Committee on Social Services sa Sangguniang Panlungsod, mukabat sa 65-mil ka panimalay ang target nga matunulan sa maong hinabang.
Samtang sa hisgutanang pagtabang sa mga estranded nga mga Butuanons sa nagkalain-laing parte sa nasud, giklaro ni Nalcot nga padayon ang ilang validation nga gihimo sa nangabot nga mga listahan aron mahatagan og pundo gikan sa Department of Social Welfare and Development kon DSWD.
Didto sa dakbayan sa Sugbu, muabot sa 161 ang estranded nga mga Butuanons diin mikabat na sa 51 ang natunulan og tag-5-mil pesos nga cash assistance human nasutang klarong nanginahanglan og tabang samtang sa MSU-Marawi, dunay 44 ka indibidwal ang natabangan pinaagi sa pag-abaga sa ilang kunsumo sulod sa 15 ka adlaw.
Giklaro ni Nalcot nga lakip sa plano sa lokal nga kagamhanan sa Butuan nga sila mapapauli ning dakbayan.
Gi-anunsiyo usab sa konsehal nga gilugwayan hangtud karung adlawa ang paghatag sa Social Ameliora tion Program kon SAP sa may City Hall .human nga natapos na niadtong Dominggo ang pagtunol sa mga hinabang sa matag barangay samtang sa Lunes, Marte ug Miyerkules gipadayon ang pag-apod-apod didto sa city hall.
Sa maong mga adlaw mukabat lamang sa 200 ka benipisyaryo ang mikuha sa ayuda dungan sa pagkumpirma nga daghan pa ang wala makadawat rason nga gilugwayan hangtud karung adlawa ang distrubusyon niini.
