BUTUAN CITY – Nagpagawas na og cease and desist order ang National Telecommunications Commission kon NTC batuk sa ABS-CBN tungod sa pag-expire sa ilang congressional franchise.
Sa kamanduang gipagawas ning adlawa Mayo 5, 2020, gimanduan sa NTC ang ABS-CBN nga ihunong na ang operasyon sa nagkada-iya nilang TV ug radio broadcasting stations sa tibuok nasud hangtud nga wala’y balidong Congressional Franchise nga maoy gi-require sa balaud.
Nasayrang ang Republic Act No. 7966 nga naghatag sa ABS-CBN og 25 ka tuig nga prangkisa aron maka-operate sa ilang mga TV ug radio stations, mi-expire kagahapong adlawa Mayo 4, 2020.
Ang Radio Control Law, Act No. 3846 as amended, nagbutyag nga wala’y tawo, kompanya, asosasyon o kaha korporasyon ang mag-construct, pag-instalar, mag-establisar o kaha mag-operate og usa ka radio transmitting station o kaha radio receiving station nga gigamit alang sa commercial purposes o kaha radio broadcasting station kung wala’y makuhang prangkisa gikan sa Kongreso.
Sa pag-expire sa RA 7966, ang ABS-CBN wala na’y balido ug subsisting congressional franchise nga maoy gi-require sa Act No. 3846.
Gimanduan na usab ang NTC regional offices pagpatuman sa closure order sa ilang tagsa-tagsa ka areas of jurisdiction.
Higayong madawat na ang tubag sa ABS-CBN, itakda na sa NTC ang pagdungog sa kaso sa pinakadaling panahon higayong tangtangon na sa gobyerno ang enhanced community quarantine.
