BUTUAN CITY – Hangtud niining mga taknaa, pabiling luwas gikan sa gikahadlukang coronavirus disease kon COVID-19 ang Caraga Region human nagnegatibo ang 23-anyos nga unang ‘Patient Under Investigation’ kon PUI nga namatay dihang gidala sa Caraga Regional Hospital sa Surigao City.
Kini ang gikumpirma ni Dr. Jose R. LLacuna Jr., Regional Director sa Department of Health kon DOH Caraga human nadawat sa buhatan kaganinang buntag ang gipagawas nga resulta sa swab test gikan sa Southern Philippines Medical Center.
Ang maong report gikalipay sa opisyal tungod kay dinhi nakumpirma nga namatay ang maong pasyente tungod sa iyang pre-existing medical condition nga Chronic Kidney Disease bisan paman nga duna usab kini travel history nga natala gawas sa rehiyon.
Sa kasamtangan, duha pa ang gi-admit nga PUI sa usa ka DOH hospitals sa rehiyon ug gipaabot pa usab ang resulta sa ilang swab tests.
