BUTUAN CITY – Ipasaka na ning adlaw pinaagi sa inquest proceedings ang kasong reckless imprudence resulting to homicide, physical injury og damage to property batuk sa sundalong nalambigit sa disgrasya bandang alas-8:00 kagabii sa Purok-4, Barangay Manapa, Buenavista Agusan Del Norte.
Ang maong insidente misangpot sa kamatayon sa usa ka motorista samtang patay usab ang angkas niining anak.
Naila ang suspek nga si Glen Burcion Amo, miyembro sa Philippine Army nga taga-Tago, Surigao del Sur.
Sa eksklusibong pakighinabi sa Bombo Radyo Butuan, gibutyag ni Patrolman Justin Bryan Bungalon, imbestigador sa Buenavista Municipal Police Station, nga dihang gibaybay sa kotseng gimanehuan sa maong sundalo ang dalan padulong sa siyudad sa Butuan, kalit kining mitabok pasulod sa eskinang bahin sa dapit nga nahitaboan rasong nabangga sa tuong bahin ang kasugat nga motorsiklong kolor pula nga gimanehuan ni Sofronio Godoncillo Jr diin angkas ang iyang anak nga si Sofronio Godoncillo III, pulos residente sa Brgy. Aklan , Nasipit, Agusan del Norte.
Tungod sa kakusog sa pagkabangga, naka-angkon og dili ti-aw nga mga injuries sa kalawasan ang mga biktima diin pag-abot sa pulis, ang anak nalang ang conscious.
Daling gidala sa Agusan Del Norte Provincial Hospital ang nasangpit nga mga biktima apan gideklarang dead-on-arrival ang amahan pinaagi ni Dr. Joson Mendez, ang attending physician kinsa nasuta nga duna’y dalang helmet apan wala kini nasuot niadtong higayona.
Samtang giklaro usab niini nga walay labot sa aksidente ang ikaduhang motorsiklo nga gipanag-iyahan ni Harold Balaquit nga taga Buenavista, Agusan del Norte.
Sumala pa sa opisyal, igo lang matud pa motan-aw unta si Harold sa nahitabo dihang natumba ang iyang motorsiklo rason nga gipug-ngan na usab siya sa mga tawo nga makabangon.
Napamatud-an usab ang maong asuy sa iyang motor nga walay gasgas niadtong higayona.
Sa karun, gikustudiya na ang sundalo og mga nalambigit nga sakyanan sa Buenavista MUnicipal Police Station alang sa tukmang disposasyon.
