BUTUAN CITY – Malampuson ang gihimong hiniusang operasyon kagahapong adlawa sa mga Police Regional Office kon PRO-13 og National Bureau of Investigation kon NBI-Caraga sa Purok 1, Barangay Cabinet, Cabadbaran City, Agusan del Norte nga miresulta sa pagkakumpiska sa lima ka armas, magazines ug nagkalain-laing mga bala samtang dakpan usab ang tulo ka suspetsado.
Sigon ni Police Brigadier General Joselito T Esquivel, Jr, PRO-13 Director, mga alas 6:47 sa buntag sa dihang gi-implementar ang Search Warrant Number 20-SW-66-C sa pinuy-anan ni Rey M. Carmona og Florenli T Tirador-Carmona sa kalapasan sa Republic Act 10591 o “Comprehensive Firearms and Ammunition Regulation Act” nga gipagawas ni Honorable Judge Dymphna C Gozon-Labindao, presiding judde sa Municipal Circuit Trial Court sa San Francisco- Rosario-Bunawan, lungsod sa San Francisco, Agusan del Sur nga dunay petsang Pebrero 11, 2020.
Sa maong operisyon, nakuhaan sila Rey Carmona, Florenli T Tirador-Carmona ug Fernando B. Lolor og usa ka unit Norinco cal. 45; usa ka unit armscor cal. 45 ;usa ka unit beretta 9mm; usa ka unit submachine gun luger (KG9) nga dunay silencer-9mm: usa ka unit shooters shotgun 12GA; duha ka beretta 9mm magazines; duha ka magazines sa cal. 45; pito ka bala sa kalibre 45; 49 ka buhing bala sa 9mm ammunition; 22 ka bala sa 12GA ammunition; ug usa ka KG9 magazine.
Ang na-arestong mga indibidwal gikustudiya sa NBI-Caraga samtang ang mga nakumpiskang butang gi-turned-over sa Regional Crime Laboratory Office-13 alang sa ballistic examination.
