BUTUAN CITY – Nag-extend sa ilang tourist visa didto sa Bureau og Immigration kon BI-Surigao City ang duha ka mga Chinese nationals nga kasakay sa unang nagpositibo sa Novel Coronavirus kon nCoV dinhi sa Pilipinas gikan sa ilang biyahe sa Hong Kong ngadto na sa Cebu niadtong Enero 21.
Kini human nakumpirma sa Surigao City Health Office nga wala’y nakita nilang problema partikular sa mga simtomas sa maong sakit human napa-ilalom sa 14 ka adlaw nga quarantine ang maong mga Intsik rason nga gitugutan na silang makabalik sa Siargao Island.
Sigon ni Dr. Juz Nicolas, ang Medical Surveillance Coordinator sa Surigao City Health Office, nakadawat sila og tawag kagahapon gikan sa Bureau of Immigration kondiin gimanduan silang susihon ang nasangpit nga mga pasyente ngadto sa Caraga Regional Hospital aron masuta ang ilang health status diin nakumpirmang wala’y problema sa ilang panglawas.
Dinhi na matud pa sila nagdesisyon uban sa ilang mga opisyal sa Department of Health kon DOH-Caraga nga tugutang maka-extend sa ilang bakasyon ang maon g mga turista.
