BUTUAN CITY – Wala na kaabot og bag-ong tuig ang tulo ka mga biktima human ang dugu-ong aksidente sa kadalanan tali sa usa ka tricycle ug de-pasaheroang bus sa national highway sa Purok-8, Barangay San Pedro, lungsod sa Alegria, Surigao del Norte kagahapong adlawa.
Dead on the spot ang mga biktima diin ang driver nga si Victoriano Nasayao taga Purok -6 San Pedro, Sison, Surigao del Norte nailhan lang pinaagi sa dala niining identification card (ID) samtang padayon pang gipakasayran ang identity sa duha ka sakay niini.
Sa pakighinabi Bombo Radyo Butuan, gipadayag ni PolMaj Renel Serrano, information officer sa Police Regional Office kon PRO-13, nga sa initial investigation sa Alegria PNP, bandang 1:30 sa hapon samtang nagsubay ang side car sa maong highway kansa dunay sakay nga 7 ka baboy, kalit lang matod pa mibuto ang usa sa ligid niini ug wala na nakontrola pa ni Nasayao ang maong sidecar rason nga misubay kini sa pikas lane resulta sa pagkadasmag niini ngadto sa bumper sa kasugat nga bus nga gimanihuan ni Neil Taperla Galinato taga Brgy. Guinabsan, Buenavista, Agusan del Norte.
Nasayrang nadaro pa ang mga biktima og pila ka metro rason sa on-the-spot nilang pagkamatay samtang luwas usab ang 27 ka mga sakay sa bus.
Gikostudiya na sa Alegria Municipal Police Station ang bus ug ang driver niini alang sa tukmang disposasyon.
