BUTUAN CITY – Gi-activate na sa Surigao City Disaster Risk Reduction and Management Office ang ilang Emergency Operations Center isip pagpangandam sa nagsingabot nga bagyong Ursula ilabina nga apil ang Surigao City sa lalawigan sa Surigao del Norte, sa mga lugar nga anaa sa storm signal number 1.
Sigon ni Surigao CDRRM Officer Threlcie Aliguay Villaces, nagpatawag kagahapon og emergency meeting si Surigao City Mayor Ernesto ‘Estong’ Matugas alang sa gihimong emergency preparations kondiin naka-preposition na ang tanan nilang mga response clusters ug andam na usab ang ilang dump truck ug back hoe nga gamiton sa himuong evacuation kung kinahanglanon.
Activated na usab ang ilang mga barangay emergency operations center ug gitambagan ang tanang 54 mga barangay nga muhimo gilayon og evacuation kung masinatian na nila ug sugod ang daut nga panahon ilabina niadtong anaa sa mga nasa landslides, storm surge ug flashfloods-prone areas.
Samtang naka-red alert na usab ang Philippine Coast Guard kon PCG-Surigao del Norte og sigon ni PCG Surigao del Norte Commander Lawrence Roque, standard operating procedure na ang pagpatuman og suspensyon sa biyahe higayong duna’y ipagawas nga weather advisory ang PAGASA aron malikayan ang disgrasya sa kadagatan kondiin sa pagkakaron, apektado ang seaboard sa Surigao del Norte.
Nasayrang kagahapon pa lang sa buntag, suspendido na ang mga biyahe sa tanang mga sakyanang pandagat sa Surigao del Norte ug gi-abisuhan na usab ang tanang mga crews sa mga barkong gustong musilong sa mga port areas sa siyudad nga musunod sa patakaran sa Philippine Coast Guard apil na niini ang pagsigurong wala kini mga sakay nga pasahero ug cargo ug kinahanglang nag-manifest sa ilang katuyuan.
Sa pagkakaron, duna na’y mga bangka ug barko nga nagtago sa mga pantalan sa Surigao City.
