BUTUAN CITY – Ipatuman na sunod tuig ang ordinansang nag-require sa tanang dagkong establisamiento ning syudad nga magbutang og seismic instrumentation room human na-aprubahan sa gipahigayong regular session kagahapon sa hawanan sa Sangguniang Panglungsod sa Butuan ang ordinansang giduso ni Konsehal Vincent Rizal Rosario.
Sa eksklusibong pakighinabi sa Bombo Radyo Butuan, gipasabot ni City Councilor Rosario nga kinahanglang ipatuman kini sa tanang mga dagkong dakbalay aron ma-detect ang gikusgon sa linog nga mu-igo ning siyudad sa umalabot.
Pinaagi matud pa sa itaud nga earthquake recording instrumentation , ma-assess usab kung unsa ang kina-iya sa dakbalay ingon man ang posibleng damyos nga mahimo depende sa gikusgon sa linog.
Ang seismic instrumentation room dakong tabang sa himuong imbestigasyon ug sa pag-amyenda sa building code sa syudad ilabina nga sa tanang kalamidad, bugtong ang linog lang ang dili kayang ma-detect busa kinahanglang i-require ang tanang establisamiento sa pagbutang og seismic instrumentation room.
