BUTUAN CITY – Mi-abot na sa tulo ang patay saa sunod-sunod nga engkwentro sa hilit nga bahin sa Brgy. San Mateo ug Manila de Bugabos ning siyudad sa Butuan tali sa gidudahang mga rebeldeng New People’s Army kon NPA ug sa mga sakop sa 4th Company sa Regional Mobile Force Battalion-13.
Una nang gibutyag ni PCaptain Emmerson Alipit, tigpamaba sa Butuan City Police Office nga na-claim na sa ilang anak ang patay’ng lawas sa magti-ayong partner nga rebeldeng New People’s Army.
Sa eksklusibong interview sa Bombo Radyo Butuan, gi-ila ni Captain Alipit ang mga biktimang sila Rolando ug Josephine Egtob, parehong residente sa Purok 8, Brgy. San Mateo ning siyudad.
Gipadayag sa opisyal nga naglusad og combat patrol ang mga sakop sa 4th Company sa Regional Mobile Force Battalion-13 human nakadawat og impormasyon kalabot sa presensya sa mga rebelde rason sa natigayong duguong binakbakay.
Narekober agikan sa encounter site ang duha ka .22 caliber rifle, usa ka kalibre 45 nga pistola ug magazine apil na ang usa ka granada.
Samtang usa usab ka 16-anyos nga bayong-bayong nga taga-Gingoog City sakop sa Misamis Oriental ang napatay sa engkwentro tali sa gibana-banang 20 ka mga sakop sa Sentro de Grabidad (SDG) CAOCAO sa Guerilla Front 4A, North Central Mindanao Regional Committee (NCMRC) ilawom kang alyas Weds/Patrick didto sa Sitio Salvacion, Manila de Bugabos ning siyudad.
