BUTUAN CITY – Ipa-ilalom sa otopsiya ang napalgang patay’ng lawas sa usa ka lalaki sa kaganinang buntag aron masuta ang hinungdan sa iyang kamatayon.
Naila ang biktimang si Jomar Benitez, 38-anyos, buwag sa asawa og residente sa Silad Mahogany ning siyudad sa Butuan.
Sigon sa iyang higalang si Charito ‘Loloy’ Amora, napalgan na lang nga nagkadugo na ang mga bukton sa biktima pasado alas-singko kaganinang buntag samtang naghigda sa waiting shed sa Purok 5, sa maong barangay.
Namasada matud pa kini og traysikel kaniadto apan mi-undang na tungod sa taas nga presyon sa dugo.
Padayon pang gipanubayan sa kapulisan ang gika-ingong upat ka mga lalaking katapusang nakitang iyang naka-uban kaganinang ala-una sa kaadlawon aron ma-imbestigahan.
Dugang pa ni Amora, wala na’y panahon ang biktima nga maka-exercise tungod sa pagkagumon niini sa mga computer games nga Dota ug Crossfire.
