BUTUAN CITY – Gikumpirma ni Police Brigadier General Joselito Esquivel Jr., Regional Director sa Police Regional Office kon PRO-13 nga nadakpan sa gihimong operasyon sa alas 6:30 gabii sa nakalabay nga adlaw sa may Barangay Limaha, Butuan City ang Finance Officer ug Intelligence Staff sa CPP-NPA.
Naila ang nasikop nga si Nori Torregosa, 37-anyos, residente sa Purok 1, Brgy Maasin, Esperanza, Agusan del Sur, ug Intelligence Staff sa North Central Mindanao Regional Committee kauban ang kapuyo nga si Melissa Comiso, 38-anyos kansa finance officer sa CPP-NPA Komisyon Mindanao.
Gihimu ang malampusong operasyon sa hiniusang element sa Regional Intelligence Division sa PRO-13, Criminal Investigation and Detection Group kon CIDG-Caraga, Butuan City Police Station -1 ug 2.
Sigon ni Police Brigadier GEN. ESQUIVEL JR , gisikop si Torregosa pinaagi sa search warrant nga dunay petsang Oktubre 10, 2019 og gi-isyu ni Presiding Judge Emmanuel E Escatron sa Regional Trial Court Branch 4 sa Butuan City tungod sa Loose Firearm.
Si Comiso ang in-charge sa palakad sa collection ug distribution sa extortion money sa Mindanao samtang si Torregosa ang responsable sa pagkolekta og pag-analisar sa impormasyon.
Ang nasangpit nga mga suspetsado dunay daghang nahibal-an sa extortion activities, dili lang sa Caraga, kundi lakip na sa entiro Mindanao.
Lakip sa nakumpiska sa pagsuhid ang duha ka granada, usa ka kalibre .45 nga pistol uban sa unom ka buhing bala, magazine, usa ka kalibre .38 revolver nga dunay 3 ka buhing bala, lima ka blasting cap nga dunay wire connector ug switches, usa ka rolyo nga detonating cord, upat ka Laptops, lima ka cellular phones, gidudahang subersibong documento ug Passport.
Alayon niini, naglaum ang regional director nga makig-kooperar ang mga nadakpan sa investigating team sa pag-ila sa mga indibiduwal, business institutions ug grupo nga naghatag ug financial support sa CPP-NPA terrorists.
