BUTUAN CITY – Mibati og kasubo si Butuan City Police Director Col. Albert Magno sa nadangatan sa puganteng si Jay-ar Mendoza, 28-anyos, residente sa Brgy. Nongnong ning siyudad sa Butuan ug nag-atubang sa kasong duna’y kalambigitan sa paglapas sa Republic Act 9165.
Kini human siya napusilan-patay dihang anaa sa kostudiya sa maong police station tungod sa pag-ilog sa armas dihang gi-eskortan na padulong sa pansayan.
Sa eksklusibong pakighinabi sa Bombo Radyo Butuan, gipadayag ni PCol. Magno nga dali silang mihimo og hot pursuit operation dihang nasayran ang pagsibat ni Mendoza kondiin sentro sa ilang operasyon ang nahimutangan sa inahan niini didto sa lungsod sa Monkayo sa Compostela Valley kon ComVal province diin nila kini subling nasikop.
Mi-uban matud pa paghatud dinhi sa Butuan ang inahan ni Mendoza.
Dihang nagpalit og ilang makaon ang inahan niini, dinhi na gisultihan si Jay-ar nga ibalik siya sa BCPS-5 ug dinhi matud pa nalain ang tono sa tingog niini sa rasong dili matud pa niini gustong mubalik sa maong istasyon.
Dinhi na kini nananghid nga mugamit sa pansayan og dihang hapit na silang mu-abot, gi-ilog niini ang armas sa pulis nga nag-escort kaniya kansa tayming usab nga nakita ni Col. Villamor rason nga gipusil kini og na-igo sa kilid sa wala niyang ilong.
Gisulayan pa kini pag-revive og daling gidala sa ospital apan gideklara nang dead-on-arrival.
Gipasabot ni Col Magno nga bisan og dili angayang mahitabo kini sa maong pugante apan kinahanglan usab nga protektahan sa ilang ka-ubanan ang ilang kaugalingon.
Kung mupasaka matud pa og kaso ang inahan sa maong pugante, dili nila kini pugngan sa rasong katungod kini niya.
Ang ila lang nga nahatag sa kasamtangan mao ang hangyo sa inahan nga ma-transport ang patay’ng lawas niini padulong sa Monkayo.
