BUTUAN CITY – Giklaro ni Cabinet Officer for Regional Development Security kon CORDS Karlo Alexi Nograles nga siya ang gitahasan ni Pangulong Rodrigo Duterte aron sayron ang mga problema sa katawhan ning rehiyon sa Caraga ilabina sa mga lugar diin kusog ang presensya sa mga rebeldeng New People’s Army kon NPA.
Kini matud pa ang hinungdan sa gilusad nga joint meeting tali sa Regional Development Council kon RDC ug sa Regional Peace and Order Council kon RPOC dinhi sa Butuan uban sa mga tag-as nga opisyal sa nagkada-iyang local government units ning rehiyon.
Tumong sa tigom ang pagpresenta og pag-adapar sa Regional Task Force to End Local Communist Armed Conflict kon RTF-ELCAC dinhi sa rehiyon.
Sa eksklusibong pakighinabi sa Bombo Radyo Butuan, gipadayag ni Nograles nga magsilbi siyang tulay sa mga Caraganons ngadto sa Malakanyang og vice versa kung hisgutan ang mga isyuang gustong ipaabot sa mga Caraganons ngadto kang Pangulong Rodrigo Duterte alang sa kalinaw ug paspas nga kalambuan ning rehiyon.
