BUTUAN CITY – Nagpadayon ang gihimong clearing operations sa mga sakop sa Butuan City Police Station 5 human ang pagpabuto sa armadong grupo pasado alas-10:15 kagabii hinungdan sa pipila ka minutong binayluay sa mga bala.
Sa eksklusibong interview sa Bombo Radyo Butuan, gipadayag ni PLt. Rannel Cayas, officer-in-charge sa maong police station, naggikan ang pipila ka mga buto sa armas duol sa tulay sa ubos nga bahin sa police station og dihang nagbayluay na og mga bala, misibat na padulong sa wala matinong direksyon ang wala pa masutang ihap sa armadong mga indibidwal.
Gipakisayran pa usab kung mga rebeldeng New People’s Army kon NPA o kaha mga lawless elements ang naghimo niini.
Kumpirmadong wala’y angol sa panig sa kapulisan samtang gipakisayran pa kung duna ba’y casualty sa panig sa mga nang-harass.
Giklaro usab niini nga wala’y gipadalang reinforcement tungod sa posibilidad nga duna’y road blocking nga gihimo ang nang-harass kanila.
Bugtong nilang gihimo mao ang pagsigurong dili makasulod sa ilang istasyon ang mga responsable ug luwas silang tanan kondiin gikumpirma niining wala’y angol kanila.
Apil sa ilang gihimo ang pagpa-abot og kabuntagon sa pag-monitor sa palibot hangtud nga nasigurong luwas na ang ilang lokasyon.
