BUTUAN CITY – Plano ni PLtGeneral Archie Francisco Gamboa – Deputy Director for Operations sa Philippine National Police kon PNP nga maglusad og community-base policy sa pagsanta sa problema sa ilegal nga druga sa tibuok Pilipinas.
Kini human nasuta nga 67-porsiento sa mga na-establisar nga Barangay Anti-Drug Abuse Councils kon BADACs ang wala mag-perform sa ilang trabaho, base na sa assessment og evaluation nga gihimo sa Department of Interior and Local Government kon DILG.
Sa eksklusibong pakighinabi sa Bombo Radyo Butuan, gipadayag sa opisyal nga isip chairman sa Oversight Committee on Illegal Drugs sa Philippine National Police kon PNP, angayan lang nga mutabang ang matag-barangay sa pagsanta sa problema sa illegal nga druga sa ilang dapit isip ilang kabahinan sa nasudnon nilang kampanya.
Apan migawas sa gihimong evaluation sa DILG nga wala mahimo sa kadaghanang mga barangay sa nasud ang pag-perform sa ilang tahas gawas pa sa wala usab pagmugna og BADAC sa ubang kabaranggayan.
Karon aron makab-ot na ang iyang tinguhang masulbad na sa hingpit ang problema sa illegal nga druga, pangayuan niya og link ang matag-barangay.
Kini aron iyang makita kung kinsa ang mga indibidwal sa matag-barangay ang nagpayuhot og ginadiling druga apil na ang ilang gidaghanan tungod kay mismong ang taga-barangay lang matud pa ang nasayod sa lihok sa ilang mga silingan.
