BUTUAN CITY – Padayong nagtinabangay karun ang kapulisan, sundalo ingon man ang fire department sa Japan human ang natigayong mudslide sa Atami City kondiin as of kagahapon sa alas 3 sa hapon, tulo na ang natalang patay samtang 80 na lang ang pabiling missing.
Sumala ni Bombo Japan correspondent Carlos Figueroa direkta gikan sa Kanagawa Ken Prefecture sa Japan sa eksklusibong pakighinabi sa Bombo Radyo Butuan, gibutyag niini nga sa wala pa mahitabo ang mudslide duna na’y nadawat nga alarm 3 ug 4 ang mga residente sa maong lugar apan igo lamang matud pa kini nagpahimangno nga mag-amping hinugdan nga walay nanghikling.
Kini ang pinakagrabeng nahitabo sa Atami City ilabina nga dili bagyo ang mihapak sa maong lugar kundi sunod-sunod lamang nga ulan nga bugti na matud pa sa usa ka buwan ang usa ka adlaw nga ulan, hinugdan sa mudslide ilabina nga duol sa baybayon ang maong lugar kansa anaa usab kilid sa bukid.
Sigon pa ni Carlos, ang kabalayan sa maong lugar, halos gama lamang sa mga light materials rason nga daling naguba. Padayon karon ang paningkamot sa gobyerno nga marekober pa ang ubang missing sa maong panghitabo.
Samtang sa hisgutanang COVID-19, gipasigarbo sa Japan ang kama-unongon sa ilang katawhan sa pagsunod sa gikantar nga health protocols ilabina ang pagsunod sa curfew hours.
Sumala pa ni Carlos, hugot nga gituman sa tanang mga residente ang mga balaod sa ilang gobyerno ilabina ang pagdili sa mga restaurants pagpa-dine in human sa alas 8 sa gabii.
Gisugdan na usab sa maong nasud ang pagbakuna sa mga adults human nabakunahan ang mga senior citizens gamit ang Pfizer ug Moderna vaccines.
Gani sukad nagsugod ang pandemya, walay lockdown nga gipatuman ang maong nasud tungod sa pagkamasulondon sa katawhan.
