BUTUAN CITY – Wala panumbalinga sa usa ka 72-anyos nga lolo bisan og tiguwang na siya nga nakahuman sa iyang pagtungha.
Si Rudy Nicolas Sucgang nga naila sa tawag nga Lolo Jao, taga-Batan, Aklan, usa ka senior high school completer, aminadong wala gika-ulaw ang pagbalik niya og eskwela bisan pa man sa iyang edad tungod kay damgo niya nga makatapos sa iyang pagtungha.
Nasayrang gidungan ni Lolo Jao ang pagtuon sa iyang pagtrabaho aron masuportahan ang iyang kaugalingon ug ang iyang tibuok pamilya.
Aminado siyang duna usa’y mga estudyanteng nang-bully kaniya apan gipadayon gihapon niya ang pagtuon aron mahimong inspirasyon sa mga susama niyang wala nakatapos sa ‘pagtungha dihang bata pa.
Subay niini, nanawagan siya kang Department of Education Secretary ug Vice President Sara Duterte nga unta matabangan siya nga makatungha sa kolehiyo sa kursong duna’y kalambigitan sa agrikultura.
Si Lolo Jao usa ka kanhi Overseas Filipino worker ug niadtong 2019, gipadayon niya ang iyang pag-eskwela tungod sa iyang pangandoy nga makasaka sa entablado aron madawat ang iyang diploma.
