BUTUAN CITY- Usa ka talagsaon nga sakyanan nga adunay disenyo nga sama sa UFO o Unidentified Flying Object ang nakadani sa atensyon sa mga traffic enforcers sa Oklahoma, USA, human kini mapara tungod sa paglapas sa balaod sa trapiko.
Atol sa patrol operation, namatikdan sa usa ka highway patrol officer ang maong UFO-inspired nga sakyanan nga nagbiyahe paingon sa Roswell, New Mexico, aron motambong sa bantugang Roswell UFO Festival.
Apan bisan pa sa talagsaong hitsura sa sakyanan, gipahunong kini sa mga otoridad tungod kay dili klaro ang plate number, kansa usa ka paglapas sa mga lagda sa trapiko. Imbis nga tikitan, gipasidan-an lamang ang mga sakay ug gihangyo nga sigurohong klaro ug makita ang plate number sa ilang sakyanan sa sunod nilang pagbiyahe.
Nasayran usab nga dili kini ang unang higayon nga nasita ang maong UFO-inspired vehicle. Una na usab kini napara sa Missouri tungod sa isyu sa rehistrasyon sa sakyanan.
