BUTUAN CITY- Patay ang 5 ka pulis samtang angol ang 3 human gi-ambush sa mga armadong kalalakihan ang tropa sa PNP sa Shariff Aguak, Maguindanao del Sur. Sa exklusibong pakighinabi sa Star FM Cotabato ug Bombo Radyo Philippines kang Police Captain Steffi Salanguit, tigpamaba sa Police Regional Office–BAR, gikan sa routine patrol ang mga biktima dihang kalit silang gipabut-han ug gipauwanan og bala samtang pabalik na sa ilang detachment.
Duha ka angol ang gipa-ilawon sa operasyon tungod sa igo sa bala samtang ang usa gitanggalan og shrapnel ug padayon nga gitambalanan sa ospital.
Sigon sa tigpamabaga nga indikasyon sa usa ka planado ug well-coordinated nga pag-atake ang maong ambush. Samtang wala pay kompirmadong ihap sa mga suspek apan aduna nay persons of interest ug gihimo na ang forensic ug ballistic examination sa lugar sa insidente.
Padayon ang hot pursuit operations sa PNP sa pakigtambayayong sa Armed Forces of the Philippines aron matino ug masikop ang mga salarin. Gipahugtan usab ang police presence, checkpoints ug intelligence operations sa lugar aron masiguro ang kaluwasan sa publiko.
Subay niini, gisiguro usab sa PNP nga dili sila mo hunong hangtud dili makab-ot ang hustisya alang sa mga namatay’ng pulis.
