BUTUAN CITY- Posibleng gamiton sa Philippine National Police kon PNP ang posibleng paglakip ni Senator Ronald “Bato” dela Rosa sa mga sesyon sa Senado pinaagi sa video conferencing aron masuta ang gipahimutangan niini, ugaling aprobahan ang proposed amendment sa rules sa Senate.
Mingtumaw ang isyu taliwa sa init nga debate tali sa Senate Majority ug Minority Blocs kalabot sa sugyot nga amyendahan ang rules aron tugotan ang mga senador nga moboto ug makalakip sa sesyon bisan anaa sa layo pinaagi sa online video conferencing.
Gikwestyon sa pipila ka miyembro sa minority ang sugyot, sa kabalakang posible matud pa kining magamit sa mga magbabalaod nga adunay gi-atubang nga kaso, imbestigasyon, o arrest warrant, lakip si Dela Rosa.
Apan, sigon sa PNP nga bisan kung tugotan ang remote participation, makatabang gihapon kini sa mga awtoridad sa pagpangita sa senador.
Si Dela Rosa gilambigit sa kasong crimes against humanity of murder sa International Criminal Court (ICC) kalabot sa kampanya kontra droga niadtong administrasyon ni kanhi President Rodrigo Duterte.
Nahisgutan usab sa diskusyon sa Senado sila Sen. Bong Go, kinsa gi-ila nga co-perpetrator sa ICC complaint, ug uban pang mga senador nga adunay managlahi nga reklamo ug imbestigasyon.
