BUTUAN CITY- Gikomperma sa mga awtoridad sa China nga 82 ka tawo ang namatay ug kapin sa 120 ang naospital human sa kusog nga pagbusikad sa gas sa Liushenyu coal mine sa Changzhi, Shanxi province niadtong Biyernes sa gabii.
Duha pa ka minero ang padayon nga gipangita samtang gihulagway nga “chaotic” ang sitwasyon human sa insidente. Nakaplagan ang seryosong paglapas sa operasyon sa minahan, lakip ang dili pagsunod sa safety protocols ug kakulang sa tracking devices alang sa mga trabahante.
Samtang gipahigayon na usab ni Presidente Xi Jinping ang paspas nga search and rescue ug hugot nga imbestigasyon aron mapatubag ang mga responsable sa usa sa pinakagrabeng mining disasters sa China sulod sa kapin 15 ka tuig. Ang state media mitaho nga posibleng doble ang aktuwal nga ihap sa mga minero nga naa sa sulod sa minahan kumpara sa opisyal nga rekord sa kompanya, nga nakapalisod sa operasyon sa pagluwas.
