BUTUAN CITY- Gi-anunsyo ni Senate President Alan Peter Cayetano ang pagmugna og Blue Ribbon Subcommittee kinsa motutok sa imbestigasyon sa daw multibillion-peso Flood Control Scandal.
Pangunahan kini ni Sen. Rodante Marcoleta, dungan sa mas halapad nga re-organisasyon sa Blue Ribbon Committee human ang pagbag-o sa liderato sa Senado.
Ang maong lakang ming-abot taliwa sa kontrobersya human magrekomenda ang Department of Justice (DOJ) og plunder ug graft charges batok kang Sen. Jinggoy Estrada ug kanhi Department of Public Works and Highways kon DPWH Secretary Manuel Bonoan kalabot sa mga iregularidad sa flood control projects.
Gisaway usab sa pipila ka political analysts ang bag-ong komposisyon sa Blue Ribbon Committee, nga daw posibleng magpahuyang sa kredibilidad sa mga imbestigasyon.
Bisan paman, gi-insistar ni Cayetano nga tumong sa subcommittee nga mapadali ang pagbulgar sa kamatuoran sa mga alegasyon sa korapsyon.
Ang Flood Control Scandal nagtumbok sa anomalya sa multi-billion pisos nga flood control projects nga adunay kalabotan sa ghost projects, overpricing, ug kickbacks.
Sa pagmugna og subcommittee, gilaomang mas mahimong hugot ang hearing ug mas kusog ang panawagan alang sa tulobagon sa mga nalambigit.
