BUTUAN CITY – Lima ka balay ang gilamoy sa kalayo kaganinang alas-8:17 sa buntag sa Purok 3-A, Brgy. San Vicente ning siyudad sa Butuan.
Sigon ni Kapitan Emman Libres, tungod sa grabe ka-init sa panahon, paspas nga nakatabok ang kalayo gikan sa pinuy-anan ni Chito Layno ilabina nga sikit kaayo ang mga balay ug sa likod pa nagsugod pag-ulbo ang kalayo hinungdan dali ra ang pagsilaab niini nga nadugangan pa sa kawala’y tubig nga magamit unta nila pagpalong sa kalayo.
Tungod niini paningkamutan ni Kapitan nga ma-revive ang ilang mga water pumps kon bomba aron magamit sa mga ingon niini nga panghitabo.
Samtang usab gipadayag usab sa residenteng si Ramil Dumalaga, blangko siya sa nahitabo tungod kay nagtrabaho siya ug gipahibalo na lang siya sa iyang silingan nga nasunog na ang ilang balay nga maoy nagrabehan tungod kay gama lamang kini sa light materials.
Padayon pa ang imbestigasyon sa Bureau of Fire Protection Caraga-Butuan Fire Station sa natigayong sunog aron masuta ang kinatibuk-ang damyos ug ang gigikanan sa kalayo.
Sigon ni FO2 Shiela Marie Gultiano, posibleng ang electrical wiring ang hinungdan sa sunog gikan sa balay nga wala’y tawo nga hayan na-trigger sa ka-init sa panahon.
Gikumpirma niini ga wala’y na-angol o kaha casualty sa nasangpit nga hitabo dungan sa pagbutyag nga nahimo gihapon nila ang ilang trabaho bisan pa man sa kakulang sa supply sa tubig tungod sa huwaw.
Alayon niini, nanawagan siya sa tanan nga mag-ignay kanunay aron malikayan ang sunog.
