BUTUAN CITY – Gikustodiya na sa Butuan City Police Station 4 ang upat ka mga hold-uppers human nila nakuha ang dul-an usa ka milyon ka pisos nga salaping cash gikan sa ulitawo nga si Raymark Babor Codaste, 26-anyos, residente sa Purok 7, Brgy. Ampayon human usab nga malampuson silang nasikop sa hini-usang pwersa sa mga otoridad ning siyudad sa Butuan.
Samtang ang mga responsable nailang sila George Dalapo Javerez, 46-anyos, residente sa Purok Bayanihan, Brgy. Banaybanay, Davao Oriental; Gemar Solidaga Tipan, 36-anyos, minyo, residente sa Bucana Piso, sa susamang lungsod; Llyod Nubbin Banquisio, 29-anyos, residente sa P 4, Calubihan, sa susamang lungsod ug Manilito Paragas Linda, 42-anyos, residente sa P2, Brgy. Del Pilar, Mabini, sa Compostela Valley.
Gika-ingong samtang sakay sa iyang motorsiklo ang biktima gikan sa BDO Montilla Boulevard padulong sa Brgy. Ampayon, pag-abot niini sa Purok 6, sa maong barangay atubang sa All Homes, gipadul-an sa mga suspetsadongsakay sa duha ka motorsiklo dayong deklara og hold-up ug pugsanong gikuha ang kolor itom nga backpack nga gisudlan sa 900-mil, 70-pisos.
Daling misibat patuo ang mga suspek apan nadakpan sila sa mga miresponding pulis. Nakumpiska gikan sa ilang posisyon ang duha ka caliber .45 nga pistola, mga pitaka nga duna’y managlahing identification cards, upat ka mga cell phones ug ang kwarta sa biktima.
Gi-andam na ang mga kinahanglanong dokumento alang sa pagpasaka og tukmang kaso pinaagi sa inquest proceeding batuk sa upat ka mga suspetsadong hold-upper.
Sa eksklusibong pakighinabi sa Bombo Radyo Butuan, gibutyag ni Butuan City Police Office Director PCol Marco Archinue, gigukod gilayon sa mga pulis apil na sa mga traffic enforcers ang mga responsable nga pasibat na unta ning siyudad sakay sa ilang motorsiklo padulong sa Polysports Complex kansa dead-end hinungdan nga sila na-corner.
Gibutyag ni Col. Archinue nga daling nadakpan ang mga tulisan tungod sa mga saksi nga mitabang usab paggukod sa mga hold-upper.
Dugang pa sa opisyal, duna na sila’y nakuhang initial records batuk sa mga responsable nga duna matud pa’y susamang record sa ubang rehiyon sa pulo sa Mindanao. Apil sa ilang gisusi karon kung duna ba’y laing mga ka-ubanan ang mga responsable.
Posible matud pa ang dugay nang gisundan-sundan sa mga responsable ang matag-lakaw sa biktima nga hayan ila na usab nga na-pattern ang matag-kuha ug hatud niya og kwarta.
Apil sa ilang susihon sa mas palawman pa nilang imbestigasyon ang posibilidad nga membro sila sa sindikato ug kung sila ba ang responsable sa uban pang mga natigayong tulis sa nagkada-iyang establisamiento ning siyudad.
