BUTUAN CITY – Dakong garbo na usab ang dala sa Caraga State University kon CSU Butuan City Campus human nga mi-abot sa 118 gikan sa 136 ka mga graduate examinees nila sa kursong Bachelor of Science in Geodetic Engineering ang malampusong mipasar sa 2022 Geodetic Engineer Licensure Examination nga gipahigayon niadtong Oktubre 6 ug 7.
Nasayrang sa maong eksaminasyon, 602 gikan sa 1,142 ka mga takers ang mipasar sa eksaminasyong gihatag sa Board of Geodetic Engineering sa Manila, Baguio, Davao, Legazpi, Lucena, Pagadian, Tacloban, Tuguegarao ug Zamboanga City.
Ang 136 ka ihap sa mga takers mao ang pinakadaghan sa kasaysayan sa CSU- Department of Geodetic Engineering. Ang pagkab-ot sa CSU sa passing rate nga 86.76% may nagbutang sa maong tunghaan nga ika-upat sa top performing schools nga duna’y 10 o kapin pa ka mga examinees.
Gawas sa maong mga passers, upat usab sa ilang mga takers ang nasulod sa Top 10 apil na niini sila Deamark Jhone Palaran nga taga-Brgy. Bilay ning siyudad sa Butuan nga gisundan ni Kent Lloyd Mañoza nga anaa sa ika-unom nga ranking samtang ikapito si John Carl Escasio ug ikasiyam si Albert Dalman.
