BUTUAN CITY – Padayon karung gisuta ang katibuk-ang damyos sa natigayong sunog kagahapon sa alas 10:00 sa buntag sa Purok-8, Barangay Ambago, Butuan City.
Kini samtang gihimo usab ang imbestigasyon sa posibleng hinungdan sa pag-ulbo sa kalayu nga midamyos sa 4 ka panimalay.
Sigon ni Fire Sr. Insp. Ronald Vasquez, Acting City Fire Marshall, Butuan City Central Fire Station, ang maong sunog nagresulta sa 2 ka panimalay nga totally damaged samtang duha usab ang partially damaged.
Base sa inisyal nga imbestigasyon, nagsugod ang kalayu sa kusina nga parte sa panimalay sa pamilyang Lascuña og nadamay laing tulo niini lakip na ang 2-storey building.
Nakatutuk karun ang ilang imbestigasyon sa pamahayag nga dunay nalimtan pag-ibot sa nakasaksak nga rice cooker apan wala gihapon nila giwala ang posibilidad sa uban pang hinungdan sa sunog.
Tungod niini, gi-awhag ni Vasquez ang tanang katawhan nga magbinantayon ilabina kay daghan na kaayung sunog ang ilang na-respondihan sugod pa niadtong Enero ning tuiga.
Kinahanglan matud pang magpakabana kita sa tanang higayon aron dili ta masunugan.
Kini dayung butyag nga lakip sa nagpalisud sa pagpalong karun sa matigayong sunog dinhe sa Butuan mao ang usahay ang kakulang sa tubig.
Gane, sa worst-case scenario, mukuha matud pa sila og tubig diha sa Agusan River nga hangtud karun wala pa nila gibuhat tungod kay makaguba man usab kini sa sakyanan tungod sa lapok og kadaghang minerales nga anaa sa suba.
Pasalamat nalang kini kay hangtud sa karun, makakuha gihapon sila og tubig diha sa mga hydrant.
