BUTUAN CITY – Hustisya ang singgit sa tagsa-tagsa ka pamilya sa duha ka mga biktima sa pagpamusil-patay ning nakalabay’ng adlaw sa may Purok 6, Barangay Kolambugan, Sibagat, Agusan Del Sur.
Naila ang mga biktima nga sila Arnel Daguim Gano, 40-anyos, menyu, usa ka chainsaw operator ug Villamor Joregie Badao, minyo, usa ka mag-uuma ug kanhi CAFGU member, parehong residente sa Purok- 2, sa maong barangay.
Base sa pamahayag sa tulo ka mga naka-uban sa mga biktima, nagbaktas sila bandang alas 7:00 sa buntag bitbit ang chainsaw aron magputol og Falcatta.
Sa dihang nakaputol na sila og lima ka gutob, kalit nga mitunga ang armadong kalalakin-an ug nakig-estorya sa mga biktima.
Dinhe na sila gilahi gikan sa duha ka mga biktima sa gilay-ong 10 metros og nadungog nalang nila ang unom ka mga buto sa armas ug nakit-an na lamang nilang patay na ang mga biktima samtang daling nanibat ang mga responsable human sa hitabo.
Gitu-uhang binuhatan kini sa mga sakop sa Communist Terrorist Group nga sakop sa SECOM 21 sa Northeastern Mindanao Regional Committee kon NEMRC.
